ВИДЕО:Остри критики од европратениците за ВМРО ДПМНЕ и за Иванов

Откако во Европскиот парламент во Стразбур, известувачот за Македонија Иво Вајгл  го презентираше извештајот за Македонија, кој го поддржаа и Европската Комисија и Советот на ЕУ, повеќе европратеници и од левицата и од десницата изразија загриженост за ситуацијата во Македонија.
„Парламентот не може да биде формиран поради систематски опструкции на ВМРО-ДПМНЕ и однесувањето на претседателот Ѓорге Иванов. Неговото однесување беше критикувано од ЕУ, САД и НАТО. Позицијата на Иванов само ја открива неговата партизираност“, рече Вајгл во воведното обраќање.

Тонино Пицула од групата на социјалистите ги критикуваше ВМРО-ДПМНЕ и Иванов дека „соочени со губење на власта ја доведуваат земјата во уште подлабока криза“. „Тие поттикнуваат протести, ги игнорираат претставниците на ЕУ, го блокираат парламентот, а загрозени се и локалните избори“, рече Пицула.
Јан Борг од Советот на ЕУ уште еднаш ја потенцираше големата загриженост поради тоа што сѐ уште нема влада во Македонија. Тој потсети дека и претседателот на Советот, Доналд Туск при последната посета на Скопје побара државништво и единство во земјата. Изразувајќи поддршка за работата на СЈО, Борг рече дека новата влада мора да работи на реформи во земјата преку реализирање на Договорот од Пржино и препораките од Извештајот на Прибе.
„Очекуваме прв приоритет на владата да бидат реформите во корист на земјата и граѓаните и враќање на земјата на европскиот пат“.
Невен Мимица од име на Европската Комисија исто така ја истакна загриженоста од одбивањето на Иванов да го додели мандатот.
„Бараме од Иванов да ги почитува резултатите од изборите и да дозволи функционирање на демократијата. Загрижени сме поради потпалувачката реторика на некои политички актери кои ги загрозуваат меѓуетничките односи“, рече Мимица.

Едуард Кукан од Европската народна партија рече дека сѐ уште чека да го види светлото на крајот на тунелот од кризата во Македонија и го повика „претседателот Иванов да ја почитува волјата на мнозинството“.