СДСМ најавува целосна ревизија на акцијата Ден на дрвото

 

Пеце Мирчевски, претседател на комисија за екологија и животна средина, најавува целосна ревизија на проектот и акција Ден на дрвото, колку пари се потрошени и какви се ефектите од 8 годишното пошумување.

,,Тука, на местото позади мене имаше парк којшто беше целосно уништен за да се изгради уште една нова барокна зграда. Како што слушнавме од „бомбите“, на Груевски постоечките згради му биле грди, па сакал да го разубави просторот. Не му било важно што ќе уништи уште едно парче од зеленилото на загаденото Скопје, не му било важно ниту дали ќе изгуби гласачи, бидејќи, како што слушнавме, сметал дека повеќето секако немало да гласаат за него, па не му биле важни.

Така се однесуваат и Никола Груевски и Коце Трајановски, кон зеленилото и кон дрвјата во Скопје. Долга е листата на уништени паркови, исечени дрвореди низ Скопје.

Истовремено, трошат милионски суми за проектот „Ден на дрвото“ а тој не дава резултати. Според Македонски Шуми, досега биле платени повеќе од 64 милиони садници кои чинеле над 10 милиони евра а на терен нема никакви резултати. И покрај целата акција, и покрај потрошените пари, се уште Скопје, заедно со Тетово, Битола и Кичево се едни од најзагадените градови во Европа.

Единствената придобивка од оваа акција е што Груевски може да се слика со лопата во рака, додека безмилосно ги троши парите на граѓаните.

Како што предвидовме во нашиот План за живот во Македонија, ќе направиме комплетна ревизија на спроведување на акцијата „Ден на дрвото” од стручен и финансиски аспект. Ќе утврдиме на кои површини се спроведуваше акцијата, колку средства се потрошени и колкав е ефектот од пошумувањето,,-изјави Мирчевски.