Во запуштениот стан во Аеродром живеело малолетно дете со неговата баба

Основното јавно обвинителство Скопје оформи предмет по допрен глас во врска со настанот што се случи на 19.09.2018 година, кога по дојава на жители од зграда во скопската населба Аеродром, во стан во истата зграда беше откриено дека семејство со едно малолетно дете живее во исклучително лоши хигиенски услови.

Предметот е оформен во насока на проверка дали детето кое што живее во станот со неговата баба  е запоставено од неговите родители.

Во таа насока, Основното јавно обвинителство Скопје издаде наредба до СВР-Скопје да ги направи сите неопходни проверки со родителите на детето. Воедно, од Центарот за социјални работи на Град Скопје беше побарано да формира стручен тим, кој ќе изготви детален извештај за семејството во кое живее детето. Тимот ќе треба да провери дали семејството досега било пријавувано во Центарот, дали било интервенирано од нивна страна и дали има пропусти во грижата на родителите за развојот на детето.

По направените проверки и обезбедените докази ќе биде донесена јавнообвинителска одлука.

Пред два дена пред и во зградата во ,,Скопјанка“ во општина Аеродром се одвиваше вистинска драма, откако жителите во паника бегаа по непријатната миризба и штипење на очите и во грлото.

Подоцна беше утврдено дека реата што се шири е од нехигиенските услови во еден стан, каде биле пронајдени стотици употребени пелени.