Вадата прва го смени старото име Република Македонија и започна со примена на новото официјално име на државата Република Северна Македонија. На официјалниот сајт е во тек промена на сѐ што беше потпишано со досегашното уставно име.

Грбот на државата е врамен со новото име испишано двојазично, на македонски и на албански јазик , согласно Законот за јазици и Договорот со Грција од Преспа.

Се менуваат и сите достапни официјални владини страници на социјалните мрежи.

Владата извести дека од денес, 12 февруари 2019 година, влегува во сила Конечната Спогодба за решавање на разликите опишани во резолуциите 817 (1993) и 845 (1993) на Советот за Безбедност на Обединетите Нации, за престанување на важноста на Привремената спогодба од 1995 година и за воспоставување на стратешко партнерство меѓу страните, што Министерството за надворешни работи соодветно го објави во Службен весник. 

Исто така, извести дека се исполнети условите за влегување во сила на амандманите ХХХIII, XXXIV, XXXV и XXXVI на Уставот на Република Северна Македонија и Уставниот закон за спроведување на амандманите од ХХХIII до ХХХVI на Уставот на Република Северна Македонија, што Собранието на Република Северна Македонија ги донесе на 11 јануари 2019 година. Истите влегуваат во сила денес, на 12 февруари 2019 година со соодветната објава од страна на Владата во Службен весник. 

Со тоа, започнува извршувањето на обврските кои произлегуваат од Конечната Спогодба и Уставните амандмани. Првичните одлуки во врска со потребните мерки и активности за извршување на горенаведените обврски ќе бидат презентирани во соопштение за јавноста кое ќе го објави Меѓуресорската работна група за извршување на обврските од Конечната спогодба, соопшти Владата на Република Северна Македонија.