Европските федералисти бараат од Груевски да престанат нападите од Чилиманов

Со наслов: „Алармантни активности на организацијата СОС – Стоп Операција Сорос кон Млади европски федералисти во  Република Македонија Унијата на европски федералисти упатија отворено писмо до Никола Груевски во кое ги осудуваат нападите кон ЏЕФ-Македонија и воопшто дејствувањето на организацијата СОС-Стоп операција Сорос и изјавите на Цветин Чилиманов.

Во продолжение ви го пренесуваме писмото до Груевски потпишано од европратениците Елмар Брок и Андреј Ковачев во целост:

 

Почитуван Г-дин Груевски,

 

Ние би сакале да го свртиме Вашето внимание кон еден инцидент, кој можеби изгледа ограничен во опфат, но кој праќа вознемирувачка порака за идната европска ориентација на Поранешната Југословенска Република Македонија и во круговите на најцврстите поддржувачи на евентуалниот пристап на земјата кон ЕУ.

Во петокот, 03.02.2017, организацијата „СОС – Стоп Операција за Сорос“  одржа прес-конференција на која ги нападна оние организации чиешто постоење го проценила за штетно по националниот интерес на  Македонија. На наше големо изненадување, меѓу овие организации се нашла и ЏЕФ Македонија. Говорникот на прес-конференцијата, господинот Цветин Чилиманов, кој според она што го знаеме е уредник на државниот медиум „Македонска Информативна Агенција“, ја опиша ЏЕФ Македонија и општо европските федералисти како контроверзна организација, а нашите идеи ги претстави како „смртоносни и опасни“.

Сметаме дека е вредно да се напомене дека Младите европски федералисти (ЏЕФ Европа) и нивната национална секција ЏЕФ Македонија се не-партиски, плуралистички младински организации кои работат во насока на постигнување на слободна и обединета Европа, управувана според принципите на демократија и владеење на правото, стремејќи се да обезбеди мир, просперитет, безбедност и правда. ЏЕФ Европа и ЏЕФ Македонија работат во насока на постигнување подлабока интеграција на Македонија во Европското семејство, кое што, се надеваме, ќе доведе до нејзино пристапување како држава-членка. ЏЕФ Европа е младинската организација на Унијата на Европски Федералисти (УЕФ), на која ние сме Претседател и Заменик Претседател.

Со оглед на близината на раководството на СОС со Владата на  Република Македонија и земајќи ги предвид другите неодамнешни изјави на политичарите од Владата во врска со т.н. „Десоросоизација“ на земјата, ние сме загрижени за активностите на нашите локални групи и ние сме дури и повеќе загрижени дека овие инциденти може да остават впечаток дека владата на Република Македонија не ги дели вредностите на УЕФ и ЏЕФ. Сепак, ние имаме целосна доверба дека е во Ваша моќ да одговорите на овие напади врз Европски федералисти во Вашата земја, и Ве повикуваме да ги употребите инструментите кои Ви се на располагање за да ги зајакнете активностите на граѓанското општество во Македонија, а во знак на поддршка на нашите заеднички европски вредности и цели.

Ние, како и ЏЕФ Европа и ЏЕФ Македонија, Ви стоиме на располагање доколку сакате овие работи да ги дискутирате понатаму во рамки на конструктивен дијалог.

 

Срдечно Ваши,

 

Елмар Брок

Претседател

Унија на Европски федералисти

Др. Андреј Ковачев

Заменик претседател

Унија на Европски федералисти