Епидемиолозите во Чаир се соочуваат со невистински информации за контакти на заразени од коронавирус

Министерот за здравство на последната прес конференција рече дека сѐ уште голем проблем е обезбедувањето на вистински информации за контактите на заразените со коронавирус.

,,Во Скопје, особено населбата Чаир, каде има најголем број потврдени случаи, за жал сѐ уште епидемиолозите се соочуваат со проблемот со обезбедување контакти и давање вистинити податоци.

 Сѐ уште се евидентираат и прекршувања и непочитување на мерката за самоизолација, но и на пропишаните мерки за групирање и за лична заштита.

 Во контекст на ова, засилени се контролите согласно координативните состаноци на Централниот штаб од страна на надлежните кои се задолжени да ги спроведуваат на терен овие активности.

 Владата веќе има донесено уредба со којашто се определува за лице кое ќе го прекрши решението за самоизолација, или дава лажни податоци, во врска со лицата со кои било во контакт, да му се одреди мерката државен карантин во времетраење од 14 дена, за што МВР донесува решение, а трошоците за сместување во тие објекти се надоместуваат од лицето“-рече Филипче.

Новозаразените, помеѓу 65% и 70% од нив се во рамките на познатите кластери, тој тренд во Скопје продолжува, но има и нови. Новите случаи се скоро секогаш поради истата причина, а тоа e непочитувањето на мерките и пред се групирање или собири.

,, И покрај забраната, луѓето прават масовни собири. Нешто што апсолутно нема логика, го осудувам и го осудуваат сите здравствени работници.

 Јасни се мерките. Граѓаните не може да се собираат, мора да носат маски. Не може да се прави свадба кога е тоа забрането. Не може други собири од 200 луѓе да се прават во Охрид кога е тоа забрането. И згора на тоа да не се соработува, да не се кажуваат точни информации“-рече Филипче.

Во штипските конфекции, од 7 досега, кои беа идентификувани дека се ризични, земени се 778 бриса, од кои потврдени се 126 позитивни случаи, хоспитализирани во болницата се 24 лица.

 Сите останати се на домашно лекување или во самоизолација, во зависност од симптомите. Од решенијата вкупно издадени од ДСЗИ, 400 лица се контакти.

 Откако се направи овој пристап, тестирање, изолација на сите контакти, состојбата во Штип и во тетовско постепено се смирува.

 Четирите големи жаришта полека спласнуваат.

,,Согласно спласнувањето во Штип и постепено во тетовско, сконцентрирани сме на сузбивање на преносот на заразата тука во Скопје.

 Препораките на комисијата остануваат исти, и бараме апсолутно да се почитуваат од сите граѓани, заради тоа што пред нас е уште долга битка со вирусот, очигледно е дека вирусот е тука, и ние ќе мора да научиме соодветно да живееме со него“-кажа министерот.

Инаку, во последното деноноќие се евидентирани 175 нови случаи на ковид 19, од кои најмногу во Скопје, дури 131.