Заев тврди дека имаат докази за повеќе освоени мандати од ВМРО ДПМНЕ

Низ институциите на системот ќе се утврди точниот број на добиени мандати, што според официјални докази покажува повеќе мандати за СДСМ, како и дека СДСМ продолжува да ја развива Македонија како демократска земја со шанса за напредок и успех и на државата и на секој граѓанин поединечно-рекол лидерот на СДСМ на средба со претставници на Националниот демократски институт од САД.

Претседателот на СДСМ, Зоран Заев, придружуван од заменик претседателката Радмила Шекеринска и потпретседателот Дамјан Манчевски денеска имаше средба со Роберт Бенџамин, регионален директор на НДИ од САД за Европа и Крис Хеншоу, директор на НДИ за Македонија.

Заедничка е оценката, информираат од оваа партија  дека излезноста на граѓаните на изборите во Македонија беше голема и граѓаните дадоа поддршка на концептот што ќе им донесе поквалитетен живот.

-На изборите поддршка од граѓаните доби концептот за заедништво, што отвора шанса за добар живот на сите граѓани на Македонија и вистински перспективи за развој на Македонија. СДСМ цврсто е определена кон фер општество за сите граѓани на Македонија, кои ќе живеат во слободна, економски стабилна, единствена Република Македонија. Мнозинството граѓани во Македонија се изјаснија за овие промени, очекувам сите партии, освен ВМРО-ДПМНЕ, да ја почитуваат волјата на граѓаните и да не формираат Влада со Никола Груевски чиешто време заврши, рече претседателот на СДСМ.