За неколку дена името Република Македонија заминува во историјата

Владата на Република Македонија, информира дека во наредните неколку дена името на нашата држава ќе биде и официјално променето во Република Северна Македонија.

,,По исполнување на сите правни услови за влегување во сила на Конечната Спогодба и Уставните амандмани, Владата на Република Македонија, ќе го објави во Службен весник датумот на влегување во сила на Уставните амандмани и Уставниот закон.

Потоа, Република Северна Македонија и Грција ќе достават заедничко писмо до Генералниот секретар на ООН, со кое го информираат Антонио Гутереш за датумот на влегување на сила на Конечната Спогодба, со што се става крај на повеќедеценискиот билатерален спор меѓу двете земји.

По ова, Република Северна Македонија на соодветен начин ги информира: Секретаријатот на ООН, земјите-членки, земјите набљудувачи на ООН, како и сите останати меѓународни организации чија членка е, за настанатите промени.

Сето ова се очекува да се случи во следните неколку дена, за што ќе бидете навремено информирани“-се вели во соопштението од Владата на Република Македонија.