Се шират со брзина на светлината, далекусежно оставајќи штетни последици во општеството. Дезинформациите најчесто се поврзани со политичките и економските теми, но и на такви кои навлегуваат во областа на здравството.

Потребно е да се зголеми свеста кај граѓаните за тоа дека треба критички да ги опсервираат информациите до кои доаѓаат, но истовремено тие и не мора да читаат сѐ што им се пласира – советуваат медиумските познавачи со кои разговараа тимовите на Здружението Медиа плус и радио Канал 77, кои имаат за цел  темата медиумска писменост да им ја доближат на младите.

Во рамките на кампањата „Медиумски писмен граѓанин – за чест без стрес, најди ја вистинската вест“, Медиа плус и Канал 77 објавија анализа, три аудио спотови, рап песна со видео запис, но и видео во кое медиумските познавачи ги споделуваат своите гледишта во врска со оваа тема.

Како изгледа „пакетот“ од интервјуата на тема медиумска писменост, погледнете во продолжение:

Современиот синоним за манипулација и пропаганда – спинувањето, во фокусот на проектот кој заеднички го продуцираа Здружението Медиа плус и радио Канал 77. Спиновите всушност, содржат манипулација со граѓаните во начинот на кој нештото се кажува или пак, во начинот на кој се избегнува да се кажат клучни работи во врска со одредена тема. Со ова, нема простор да се добие објективна слика за настаните, а тој што е изманипулиран не е свесен кој го убедил дека некои работи се подобри од тоa што навистина се или обратно – порачуваат познавачите на темата медиумска писменост.

Видеото кое е посветено на спинувањето, е последно од низата мултимедијални продукти кои Медиа плус ги објави во соработка со Канал 77 како дел од проектот КриТинк на фондацијата Метаморфозис и центарот Евротинк.