Молк во ВМРО ДПМНЕ по губењето на еднодневното мнозинство во струмичкиот Совет

ВМРО ДПМНЕ неполни 24 часа откако објави дека го презеле мнозинството во Совет на општина Струмица, пак се најде во опозиција во овој град.  Пребеганиот советник во нивните редови, Методи Витанов пак се врати во јатото на СДСМ, тврдејќи дека бил изманипулиран за што си поднесе оставка и од неговата матична партија ВМРО НП.

Нема реакција од ВМРО ДПМНЕ.

Тие вчера помпезно, пренесувано на неколку провладини телевизии во живо, најавија дека СДСМ и Заев се поразени во Струмица.

,,СДСМ и Зоран Заев се поразени во Струмица.Од денес Зоран Заев и СДСМ немаат мнозинство во Советот на општина Струмица. Тие не се власт и немаат кредибититет да продолжат да управуваат и владеат во Струмица, истакна на денешната прес конференција Зоран Пакетов советник во општина Струмица.

-Коалицијата предводена од ВМРО-ДПМНЕ „За подобра Македонија“ и ВМРО-НП имаат легитимно мнозинство во Советот на општина Струмица. Дванаесет советници, 12 потписи наспротив 10 советници застапувани од СДСМ. СДСМ немаат легитимитет да продолжат да управуваат затоа што немаат мнозинска поддршка од граѓаните.

Советниците на ВМРО-ДПМНЕ во Советот на општина Струмица бараат итно да се свика седница на Советот на која ќе се верификува новото советничко мнозинство и ќе се избере нов претседател на Советот.

-Потоа, ќе побараме избор на нов градоначалник на општина Струмица бидејќи Зоран Заев веќе нема легитимитет, тој веќе не е власт во Струмица. Ова значи нов почеток за општина Струмица. Почнува транпарентно и отчетно работење во Струмица. Ова значи крај на нетранспарентните и матни тендери и богатење на поединци на грбот на општина Струмица. Ова значи крај на ерата на заплашување и притисоци. Струмичани добиваат одговорна власт за граѓаните. Ќе биде направена целосна ревизија на работењето во сите општински институции и започнува почеток на многу проекти за граѓаните на општина Струмица, изјави вчера членот на Советот во Струмица Пакетов.

АКО.мк