Овој народ ниту се води, ниту се тера

Пишува: Емилија Лазаревска

Се покажавме како најнеизживеан народ, без чувство за лична одговорност, без свест за колективност и општествена одговорност.

Никој не крена џева зошто не работат училиштата, не се загрижија за (не) образованието на своите деца, никој не се побуни зошто не одат на работа, на пример во администрација, а си земаат платичка, никој не се понуди некаде да волонтира(чест на ретки исклучоци), секаде едно време им аплауидираа на лекарите и медицинските сестри, само кај нас не.

Само кај нас е срамотно да побараш во разумно време лекарска помош, да кажеш дека имаш коронавирус, да ги заштитиш другите, себеси да се спасиш. Кријат, даваат лажни контакти, бегаат, ги ловат како дивеч низ државата. Немаат емпатија кон лекарите и медицинските сестри, велат, тоа им е работа. Само кај нас мисли (тој, граѓанинот), дека државата треба да го контролира нон-стоп дали почитува мерки, инаку нормално нема свест и ,,се снаоѓа“ на секој можен начин, ама ако го фатат и го казнат, потоа ја плука државата и сите други му се виновни, само тој не.


НО, први се да се сликаат како слават распојасени и прегрнати и притоа го поздравуваат Венко?! Се прават кампањи од лажни профили да не прифаќаат тестирање за коронавирус и вакцинирање. Побогу кој стои зад тие профили, што лејки се?!

Ги сликаат софрите за полуматура, а децата не им одат цело полугодие во училиште. Не им е гајле што се полу или целосно неписмени. Прават свадби и ги кријат контактите. Спасовдени, имендени, родендени, ифтари, литии…


Парковите се претворени во кафани на отворено. Младината се пијанчи, џаболебари, нема ориентација што да прави со себе. Никој не ѝ помага. Секоја вечер иста приказна. Поминуваме покрај нив со наведнати глави. Смее некој нешто да им каже? Тие лудуват, ние полудуваме. Тие го оставаат ѓубрето зад себе, комуналците утрината го собираат. Ефектот нула, вртење во круг, тапкање во место.


Мијте раце, одржувајте хигиена…ѓубре насекаде.
Заштитните маски станаа декор на рака како часовник, на лакт, под брада, на чело, на ретровизор, на асфалт, во парк, на клупа, во тревник…секаде. Најмалку таму каде што треба, на нос и уста, не само на уста…


Струката ти вели дека вирусот се пренесува преку тоа што го исфрламе од себе како честички, тој поминува покрај тебе плука, носот го секне со рака, кива сочно без да стави рака…

Ама, за сѐ имаат коментар, свое мислење. Се разбира, не прифаќа второ мислење. Ако има полициски час, тогаш е полициска држава, ако го укинат, еве ги, не знаат каде тераат, па бараат полициски час. Ако ја затворат границата , сме станале карантин држава, ако ја отворат, ете не мислат на народот, гласови купуваат од дијаспората.

Ако го прашаат да каже нешто во камера на улица, молчи, не знае два збора да сврзе, ако отвори уста на ФБ сокриен зад тастатура и лажен профил, пцуе, колне и навредува.


Па добро, каква е оваа ситуција?!


Дел од народот ниту се води, ниту се тера…(што би рекол почитуваниот д-р Жарко Караџовски.

Во меѓувреме…

,,На еден од видео материјалите, сосема амбивалентно(што и да значи тоа-моја забелешка) , една од славеничките ја вади маската од џебот и ја користи како шамиче за виење на чело на орото.

Додека здравствените работници се на раб на премаленост, болничките капацитети се сериозно оптоварени, а пациенти со тешка клиничка слика се борат за живот, коронавирусот, едноставно, за некои граѓани како да не постои.

Сарказмот и иронијата одат дотаму, што групи кои се претставуваат како „риболовни друштва“ на Фејсбук му испраќаат ироничен поздрав на министерот за здравство Венко Филипче, додека се фотографирани во група, без маски, без дистанца“-пишува денеска Слободен печат.

—————————————————————————————————————

( Емилија Лазаревска е основач и Главен и одговорен уредник на портал АКО.мк. Професионален новинар е од 1986 година, кога, како студент на новинарство, почна да работи како хонорарен соработник во Телевизија Скопје, каде стекна богато новинарско искуство. На почетокот на деведесетите беше вработена во МТВ на неопределено време. Во 1998 година ја напушти МТВ и оттогаш, од самите почетоци и формирањето на телевизијата, па сѐ до 15 јуни 2016 година, работеше во Телма како новинар и уредник. Во нејзината 18 годишна кариера во Телма учествуваше во формирањето на редакцијата на вестите, а 13 години беше Одговорен уредник на вести)