Политичар им нудел поткуп на потенцијални гласачи да гласаат за ВМРО ДПМНЕ

Двајца граѓани од Прилеп пријавиле дека претставик на политичка партија им понудил соодветна сума, како поткуп за глас за изборите. Ова денеска го изјави министерот Оливер Спасовски кој информираше дека веќе е изготвена кривична пријава против еден сторител, за што е известен јавниот обвинител и се преземаат мерки за целосно откривање на овој случај.

,,Апелирам до политичките партии кампањите да ги водат на ниво на програми и концепти и без злоупотреби. Апелирам до граѓаните доколку забележат случај на злоупотреба од кој било политички субјект тоа веднаш да го пријават во полициска станица и да соработуваат со МВР, рече министерот Спасовски по посетата на битолската полиција.

Министерот за внатрешни работи Оливер Спасовски денеска ги посети Секторот за внатрешни работи- Битола и полициската станица Прилеп во рамки на посетите кои се реализираат во секторите за внатрешни работи во државата, со цел одблиску да се запознае со моменталните состојби и проблемите со кои се соочуваат, но и уште еднаш да потенцира дека не смее да има никакви притисоци врз граѓаните на престојните избори.

-Најстрого ќе биде казнет секој полицаец кој што ќе учествува во изборната кампања на било која од политичките партии. Има такви случаи во Струга и уште неколку места и преземени се одлучни мерки. Полицијата мора да биде сервис на граѓаните. Карактеристичен настан има во Прилеп, каде што од страна на двајца граѓани на Прилеп е пријавено нудење на поткуп во име на ВМРО-ДПМНЕ за глас на изборите. Поднесена е кривична пријава, известен е јавниот обвинител и се преземаат мерки за расчистување на случајот. Ваквите работи се недозволиви и доколку се случуваат ќе има енергична реакција на МВР. Апелирам до граѓаните доколку забележат ваков или било каков случај на злоупотреба од било кој политички субјект веднаш да го пријават во полициската станица. Доколку почувствуваат притисок од било кој државен орган или било кој раководител веднаш да го известат МВР за да можат да се преземат соодветни мерки- рече министерот Спасовски.