Прилепчанец ги убил поранешната сопруга и нејзината мајка

Прилепчанец со огнено оружје ги убил сопругата и нејзината мајка, а го ранил и братот на сопругата. Во обид да биде совладан и тој бил повреден, известува државната новинска агенција МИА.

Јавен обвинител во координација со екипи на крим-техника од Министерството за внатрешни работи, извршиле увид во куќа на ул. „Александар Македонски” во Прилеп, каде утринава во 8 часот биле пронајдени две безживотни тела.

Од Јавното обвинителство информираат дека на безживотните тела на А.П. родена 1979 година и нејзината мајка Т.К. родена 1956 година, се забележани прострелни рани. Во нив пукал сега осомничениот, 50-годишниот поранешен сопруг и зет на починатите.

Со две прострелни рани се здобило и уште едно лице, брат и син на оштетените, кое било во просторијата. При обидот да биде совладан, повреден е и осомничениот. Повредените, оштетен и осомничениот се пренесени во прилепската болница каде им се укажува медицинска помош.

Во насока на расчистување на кривично правниот настан, по наредба на јавниот обвинител подигнати се и обезбедени траги од лице место. Издадена е  наредба за обдукција над починатите. Обезбедените траги од лице место ќе бидат предмет на вештачење.

Јавниот обвинител издал и наредба за претрес во домот на осомничениот прилепчанец кој, според сознанијата на Обвинителството, поради претходно нарушени брачни односи не живеел во заедница со неговата сега почината сопруга.

Извор:МИА