Синдикатот на Клинички предлага сет мерки по физичките напади на здравствени работници од пациенти

Нападот врз медицинска сестра во болницата во Драчево од страна на 41 годишен пациент, е последниот во низата напади врз здравствените работници.

Претходно, пред неколку денови , беше претепан доктор во болницата во Тетово.

Синдикатот на Клинички центар го осуди физичкиот напад врз докторoт дерматовенеролог вработен во Клиничката болница во Тетово и врз медицинската сестра.

,,Овој дрзок и брутален напад извршен во присуство на органите на јавен ред и мир укажува дека и покрај сите декларативни изјави, Повелби и Декларации потпишани и искажани во изминатиот период со цел ваквите инциденти да се спречат или станат изолирани појави, истите и понатаму продолжуваат и се со зголемен интензитет и честота.

Очигледно е дека докторите, медицинските сестри и останатите вработени во здравството при извршување на своите работни задачи се недоволно заштитени, и секојдневно изложени на животозагрозувачки инциденти“- се вели во нивната реакција.

Синдикатот на Клинички центар предлага сет мерки за да се спречи насилсгтвото во здравствените институции.

Синдикатот на Клинички центар за цело време во изминатиот период укажува на потребата од изготвување законска регулатива која ќе го обврзе работодавачот да обезбеди систем на професионална и ефикасна заштита од физичко и вербално насилство на вработените во здравството.

Мерките што ги предлагаат се:

1. Унапредување на здравствената и општа култура на населението.

2. Почитување на етичкиот и морален кодекс од страна на здравствениот и друг персонал.

3. 24 часовно професионално обезбедување на сите ЈЗУ во Република Македонија со контролиран и ограничен пропуст на цивили и членови на фамилија, слично како во приватните болници.

4. 24 часовен централен видео надзор на влезовите, излезите и поедини простории во објектите на ЈЗУ со почитување на законските и други прописи и норми за заштита на личните и други права на пациентите и вработените.

5. Останати методи и мерки кои ќе превенираат насилство“-стои во соопштението.

Синдикатот на Клинички центар е подготвен заедно со Ресорното Министерство, Лекарската комора и другите комори и здруженија во здравството, Македонското здружение за заштита при работа и други релевантни чинители, преку стручни состаноци, јавни дебати и други постапки да учествува во изнаоѓање најсоодветно решение за сузбивање на вербалното и физичко насилство во здравството, кое со законска регулатива ќе го обврзе работодавачот да обезбеди превентивен систем на професионална и ефикасна заштита од физичко и вербално насилство на вработените во здравството.