Средба на Заев и Црвенковски во Влада на тема Подгорички клуб на поранешни претседатели

Претседателот на Владата на Република Северна Македонија, Зоран Заев денеска го прими поранешниот Претседател на Република Македонија, Бранко Црвенковски, кој на оваа средба дојде во својство на член на Подгоричкиот клуб на поранешни претседатели на држави и шефови на влади на земјите од регионот.

За време на средбата, поранешниот Претседател на државата Црвенковски го информираше премиерот Заев за иницијативата Подгоричкиот клуб да организира регионална конференција во Скопје на тема „Проширувањето на ЕУ на крстопат“ на почетокот на јуни оваа година.

Целта на оваа конференција, како што на средбата истакна господинот Црвенковски, е да се поттикне и обезбеди поддршката за пристапување на земјите од Западен Балкан во ЕУ, со декларација која од конференцијата ќе им биде испратена на лидерите на Европската Унија со укажување на негативните последици на национално и регионално ниво што би произлегло од евентуалното одлагање на овој процес.

Претседателот на Владата на Република Северна Македонија ја прифати поканата да ја поддржи конференцијата и да биде домаќин на прием што по тој повод ќе биде одржан за учесниците на настанот.