Телото на убиениот Пинета Секондо е пронајдено во село Љуботен

На 31.05.2019 година Единица за насилен криминал при СВР Скопје до надлежното Основно јавно обвинителство во Скопје, поднесе кривична пријава против Ф. А. (27) и А. Ѓ. (22), двајцата од Скопје, за сторено кривично дело ,,убиство“ предвидено и казниво по член 123 од КЗ на РСM, соопшти МВР.

Имено, се работи за убиство на Пинета Секондо, кој на 11.12.2018 година од страна на неговата мајка, бил пријавен за исчезнат во ПС при СВР Скопје.

На 29.04.2019 година во Единицата за известување и команда при СВР Скопје од страна на граѓанин пријавено е дека на место викано Башинец во атарот на с.Љуботен пронајден е човечки скелет покриен со камења.

По преземени оперативно тактички мерки дојдено е до сознание дека извршители се горенаведените лица, по што добиена е Наредба за претрес во дом и други простории од Основно јавно обвинителство Скопје и извршен е претрес во домовите на пријавените како и на уште две лица , роднини на првопријавениот.

Во домот на првопријавениот пронајдени се СИМ картички, лични документи, мобилен телефон, УСБ, мемориска картичка, една фантомка и возило Опел Аскона.

По Ф.А. распишана централна потерница. На 30.05.2019 година второпријавената А.Ѓ. е лишена од слобода во просториите на СВР Скопје.

Мајката на убиениот протестираше во неколку наврати пред Собрание и го обвинуваше МВР дека не презема ништо да го пронајде нејзиниот исчезнат син.

Не се објавени причините за ова злосторство.