Тридневна програма за Водици во Охрид

Општина Охрид ја објави програмата за одбележување на христијанскиот празник Водици во Охрид.

Во рамки на програмата за одбележување на големиот христијански празник Богојавление-Водици, Општина Охрид организира голем концерт на балканската музичка ѕвезда Петар Грашо, кој ќе се одржи во пресрет на празникот на 18-ти јануари со почеток во 20 часот на Градскиот плоштад „Свети Климент Охридски“.

На 19-ти јануари на денот на празникот, со почеток во 10 часот на Градското пристаниште ќе се одржи голем црковно-народен собир по повод Богојавленскиот водосвет и традиционалното фрлање на Светиот крст во водите на Охридското Езеро.

Во насока на збогатување на содржините за гостите, на 20-ти јануари во рамки на манифестацијата Денот на рибарите, на празникот Свети Јован Крстител, на Градскиот плоштад со почеток во 12 часот ќе се одржи концерт на македонската фолк ѕвезда Миле Кузманоски.

Иако 19 јануари, Водици е неработен ден за граѓаните од христијанска вероисповед, со оглед на тоа што се паѓа во недела, Министерството за труд објави дека недела е неработен ден, што значи нема поместување во понеделник како што е случај со државните празници.