Филипче: Крајно загрижувачко е однесувањето на дел од граѓаните, коронавирусот не е мртов!

Министерот за здравство, Венко Филипче, е загрижен поради однесувањето на дел од граѓаните. Тој порача дека нивното неодговорно однесување ги доведува во ризик оние што ги почитуваат мерките.

,,Фотографиите и прилозите од вчерашното празнување во верските храмови и пред нив се повторно загрижувачки. И покрај апелите на здравствените институции да нема масовни собирања, да се почитуваат мерките за држење дистанца и ограничувањето на движењето, тоа не се случи.
Го почитувам празнувањето и силно верувам дека тоа се значајни настани за сите нас, независно на која вера припаѓаме. Но, оваа година празниците во целиот свет се празнуваат на еден поинаков начин, ставајќи го сопственото здравје и на нашите сограѓани пред сѐ и над сѐ.
Им благодарам на граѓаните кои се придржуваат кон мерките, а кои за жал, понатаму можат да бидат изложени на ризик поради оние коишто тоа не го прават.
Коронавирусот ниту е мртов ниту е заминат. Тој е тука и за жал, проблемот ќе се провлекува сѐ додека има такви кои го ингнорираат. Многу пати повторив, но еве уште еднаш ќе кажам.

Здравствените работници не можат сами. Мерките се добри и навремени, но тие функционираат само ако се почитуваат, во спротивно немаат ефект. Почитувањето на мерките и ефектите од нив зависат само од нас како граѓани. Едноставно мора да се прифати новиот начин на живот, мора нашето секојдневие да го прилагодиме почитувајќи ги препораките“-реагираше министерот по вчерашните прослави и молитви за време на муслиманскиот празник Рамазан Бајрам.

Тој на овој начин му одговори и на поглавараот на ИВЗ кој вчера го прогласи корона вирусот за умрен.